আন্তৰ্জাতিক নাৰী দিৱসৰ দিনাই উদ্ধাৰ হৈছে বোকাখাত নগৰৰ নিচেই সমীপৰ প্ৰকৃতিৰ ৰাণী কাইফলাংচু জলপ্ৰপাতত এগৰাকী মহিলাৰ মৃতদেহ। এই লৈ সৃষ্টি হৈছে ব্যাপক চাঞ্চল্যৰ।
আজি আন্তৰ্জাতিক নাৰী দিৱস।এই বিশেষ দিনটোত এগৰাকী মহিলাৰ মৃতদেহ উদ্ধাৰ হোৱা ঘটনাই হতবাক কৰিছে সকলোকে। বোকাখাত কাৰ্বি-আংলং সীমান্তৱৰ্তী কাকচাং কাইফলাংচু জলপ্ৰপাতত এগৰাকী মহিলাৰ মৃতদেহ ওপঙি থকা দেখি স্থানীয় লোকে ডলামৰা আৰক্ষীক খৱৰ দিয়ে।
ডলামৰা আৰক্ষীৰ লোক ঘটনাস্থলিত উপস্থিত হৈ মহিলা গৰাকীৰ মৃতদেহ উদ্ধাৰ কৰি যাৱতীয় ব্যৱস্থা গ্ৰহণ কৰিছে। বৰ্তমান লৈকে মৃতদেহটো চিনাক্ত কৰিব পৰা হোৱা নাই।ডলামৰা আৰক্ষীৰ ভাষ্য অনুযায়ী আজি পুৱাৰ ভাগত মহিলা গৰাকীৰ মৃত্যু হ’ব পাৰে।
অৱশ্যে এই সংক্ৰান্তত নিৰুদ্দেশ সম্পৰ্কীয় কোনো অভিযোগ দিয়া নাই। উল্লেখ্য যে এই জলপ্ৰপাতলৈ যোৱা পৰ্যটকৰ সকলক সৰ্বতোপ্ৰকাৰ সুবিধা আৰু সতৰ্কতাৰ বাবে এখন সমিতি আছে। সমিতিৰ ভলন্টিয়াৰে দুপৰীয়াৰ ভাগতহে মৃতদেহটো ওপঙি থকা দেখি আৰক্ষীক খবৰ দিয়ে।
আশংকা কৰা মতে পুৱাৰ ভাগত একাধিক লোক জলপ্ৰপাতটোলৈ গৈছিল।এই লোক সকলৰ প্ৰৱেশৰ তালিকা সঠিক ভাৱে যদিহে তদাৰক সমিতিয়ে ৰাখিছে, তেন্তে মহিলা গৰাকীৰ পৰিচয় উদ্ধাৰ হ’ব পাৰে।
