যৌতুকৰ ধন নিদিয়াৰ ৰূপহীহাটৰ উত্তৰ খাটোৱালত স্বামী চাজিদ আলীয়ে পেট্ৰ’ল ঢালি জ্বলাই দিলে পত্নী মৰ্জিনা খাতুনক। সোমবাৰে বিয়লি মৃত্যুৰ সৈতে যুঁজি নগাঁৱৰ ভোগেশ্বৰী ফুকননী চিকিৎসালয়ত শেষ নিশ্বাস ত্যাগ কৰে মৰ্জিনাই।
দুবছৰ পূৰ্বে মৈৰাবাৰীৰ চাজিদ আলীৰ সৈতে বিবাহপাশত আবদ্ধ হৈছিল মৰ্জিনা। তাৰ পিছৰে পৰা যৌতুকৰ ধন দাবীৰে মৰ্জিনাৰ ওপৰত অকথ্য নিৰ্যাতন চলাইছিল চাজিদে।
উল্লেখ্য যে, কিছুদিন ধৰি ৰূপহীহাটৰ উত্তৰ খাটোৱালৰ শহুৰেকৰ ঘৰতে থাকিবলৈ লোৱা চাজিদে প্ৰায়েই শহুৰেকৰ পৰিয়ালৰ পৰা যৌতুকৰ নামত ধন দাবী কৰি পত্নীৰ ওপৰত চলাই আহিছিল নিৰ্যাতন। ইয়াৰ ভয়ংকৰ পৰিণতি স্বৰূপে দেওবাৰে পত্নী সহিতে শহুৰেকৰ বাসগৃহত পেট্ৰোল ঢালি জ্বলাই দিছিল পাষণ্ড স্বামীয়ে।
মৃত্যুৰ পুৰ্বে পাষণ্ড স্বামীৰ সমস্ত বৰ্বৰতাৰ বিষয়ে অন কেমেৰাত বৰ্ণনা কৰিছিল পত্নী মৰ্জিনা খাতুনে। ইতিমধ্যে নিহত মৰ্জিনাৰ পৰিয়ালে ৰূপহীহাট আৰক্ষী থানাত এজাহাৰ দাখিল কৰিছে যদিও বৰ্তমান সময়ত পলাতক অৱস্থাত আছে হত্যাকাৰী স্বামী চাজিদ আলী।
