দেওবাৰে ৰাজ্যত অনুষ্ঠিত হয় এক সৰ্ববৃহৎ চৰকাৰী পদত নিযুক্তি পৰীক্ষা। উক্ত নিযুক্তিৰ লিখিত পৰীক্ষাৰ বাবে গ্ৰহণ কৰা হয় কটকটীয়া নিৰাপত্তা ব্যৱস্থা। কোনো ধৰণৰ অপ্ৰীতিকৰ পৰিস্থিতি তথা খেলিমেলি বন্ধ কৰিবলৈ পৰীক্ষাৰ সময়ত চাৰি ঘণ্টা ধৰি বন্ধ কৰি দিয়া হয় মোবাইল ইণ্টাৰনেট সেৱা। ৰাজ্য চৰকাৰে অৱগত কৰোৱা মতে, পৰীক্ষা কেন্দ্ৰ থকা সকলো জিলাতে সেৱাসমূহ বন্ধ কৰি দিয়া হয়।
উল্লেখ্য, অসম চৰকাৰৰ বিভিন্ন পদত ২৬ হাজাৰ কৰ্মচাৰী নিযুক্তি দিয়া হʼব। ইয়াৰ বাবে লিখিত পৰীক্ষাত অৱতীৰ্ণ হৈছে ১৪ লাখ পৰীক্ষাৰ্থী। অসম চৰকাৰে জনোৱা মতে, পৰীক্ষা কেন্দ্ৰসমূহত নিৰাপত্তা ব্যৱস্থা কটকটীয়া কৰিবৰ বাবে যথেষ্ট সংখ্যক নিৰাপত্তাৰক্ষী মোতায়েন কৰা হয়।
আনহাতে, পৰীক্ষা কেন্দ্ৰসমূহৰ ১০০ মিটাৰৰ ভিতৰত ১৪৪ ধাৰা জাৰি কৰা হয়। মোবাইল ফোন লৈ পৰীক্ষা কেন্দ্ৰত প্ৰৱেশ কৰিবলৈ দিয়া হোৱা নাই পৰীক্ষাৰ্থী তথা পৰীক্ষকসকলক। সমগ্ৰ পৰীক্ষা প্ৰক্ৰিয়াটো ভিডিঅʼ কৰিবলৈ নিৰ্দেশ দিয়া হয় কেন্দ্ৰটোৰ ভাৰপ্ৰাপ্ত বিষয়াক।
আনহাতে, পৰীক্ষাৰ পূৰ্বে মুখ্যমন্ত্ৰী হিমন্ত বিশ্ব শৰ্মাই জিলা উপায়ুক্তসকলৰ লগতে আন আন বিষয়াসকলৰ সৈতে এক ভিডিঅ’ কনফাৰেন্স অনুষ্ঠিত কৰে। তেওঁ কটকটীয়া নিৰাপত্তাৰ অধীনত মুক্তভাৱে পৰীক্ষা অনুষ্ঠিত কৰিবলৈ নিৰ্দেশ দিয়ে।
