প্ৰধানমন্ত্ৰী নৰেন্দ্ৰ মোদী (Narendra Modi)ৰ উপস্থিতিত মঙলবাৰৰ পৰা আৰম্ভ হʼল উত্তৰ-পূব ভাৰতৰ (North-East India) দুখন ৰাজ্যৰ বিজেপি সমৰ্থিত চৰকাৰৰ যাত্ৰা। নেচনেল পিপ’লছ পাৰ্টিৰ মুৰব্বী কনৰাড চাংমাই (Conrad Sangma) মেঘালয়ত দ্বিতীয়বাৰৰ বাবে মুখ্যমন্ত্ৰী (Chief Minister) হিচাপে শপত গ্ৰহণ কৰে। আনহাতে, নাগালেণ্ড (Nagaland)ত পঞ্চমবাৰৰ বাবে নেচনেলিষ্ট ডেমোক্ৰেটিক প্ৰগ্ৰেছিভ পাৰ্টিৰ সভাপতি নেফিউ ৰিঅʼই (Neiphiu Rio) মুখ্যমন্ত্ৰীৰ আসন গ্ৰহণ কৰে। শপত গ্ৰহণ (Swearing-in) অনুষ্ঠানত মোদীৰ লগতে কেন্দ্ৰীয় গৃহমন্ত্ৰী অমিত শ্বাহ (Amit Shah) আৰু বিজেপিৰ সভাপতি জে পি নাড্ডাও উপস্থিত থাকে। লগতে থাকে অসমৰ মুখ্যমন্ত্ৰী তথা নেডাৰ আহ্বায়ক হিমন্ত বিশ্ব শৰ্মা আৰু অৰুণাচলৰ মুখ্যমন্ত্ৰী।
মেঘালয়ত এনপিপিৰ মুৰব্বী কনৰাডে ১১ জন মন্ত্ৰীৰ সৈতে ৰাজ্যপাল ফাগু চৌহানৰ আগত শপত গ্ৰহণ কৰে। ইয়াৰ ভিতৰত এন পি পিৰ ৯ জন, ইউনাইটেড ডেমোক্ৰেটিক পাৰ্টিৰ ২ জন, বিজেপি আৰু এইচ এছ পি ডি পিৰ ১ জনকৈ মন্ত্ৰী আৰু উপ-মুখ্যমন্ত্ৰীয়ে শপত গ্ৰহণ কৰে। নিৰ্বাচনৰ পূৰ্বে প্ৰতিটো দলে পৃথকে পৃথকে যুঁজ দিছিল যদিও ত্ৰিশংকু বিধানসভাত নিৰ্বাচনৰ পিছত চাৰিটা দলে মিত্ৰজোঁট গঠন কৰি ক্ষমতা দখল কৰিছিল। উল্লেখ্য, মেঘালয়ে ৪ দশক ধৰি ত্ৰিশংকু পৰম্পৰা বজাই ৰাখিছে।
মেঘালয় বিধানসভাৰ ৬০খন আসনৰ ভিতৰত ৫৯খন আসনত ভোটগ্ৰহণ অনুষ্ঠিত হয়। কিন্তু কোনো দলেই প্ৰয়োজনীয় সংখ্যক সংখ্যাগৰিষ্ঠতা নাপালে। এন পি পি ২৬, ইউ ডি পি ১১, কংগ্ৰেছ আৰু তৃণমূল ৫ খনকৈ, ভইচ অৱ দ্য পিপল পাৰ্টিৰ ৪ খন আসন। বিজেপি, এইচ এছ পি ডি পি, পিডিএফ আৰু নিৰ্দলীয়ই ২ খনকৈ আসন লাভ কৰে। ইতিহাসে কয় যে শেষবাৰৰ বাবে ১৯৭৮ চনৰ বিধানসভা নিৰ্বাচনত মেঘালয়ত ‘অল পাৰ্টি হিল লিডাৰছ’ সন্মিলনে একক সংখ্যাগৰিষ্ঠতা লাভ কৰিছিল।
আনহাতে, নাগালেণ্ডত বিজেপিৰ সৈতে মিত্ৰতা কৰি ৰিঅʼৰ এনডিপিপিয়ে নিৰ্বাচনত অৱতীৰ্ণ হৈছিল। মঙলবাৰে ৰিঅʼৰ সৈতে তেওঁৰ দলৰ বিধায়ক তথা প্ৰাক্তন মুখ্যমন্ত্ৰী টি আৰ জেলিয়াঙে ৰাজ্যপাল লা গণেশৰ ওচৰত শপত গ্ৰহণ কৰে। বিজেপিৰ ৱাই পেটনে উপ-মুখ্যমন্ত্ৰীৰ পদ লাভ কৰে। ৰিঅʼৰ মন্ত্ৰীসভাত মুঠ ৯ জন লোক আছে, যʼত আছে ৰাজ্যিক বিজেপিৰ সভাপতি টেমজেন ইমনা আলং আৰু এনডিপিপিৰ নেত্ৰী তথা নাগালেণ্ডৰ প্ৰথম দুগৰাকী মহিলা বিধায়কৰ ভিতৰত এগৰাকী ছালহাউটুনাউ ক্ৰুজ। কিন্তু এনডিপিৰ জনপ্ৰিয় নেত্ৰী তথা ৰাজ্যৰ আন এগৰাকী মহিলা বিধায়িকা হেকানী জখলুৰক মন্ত্ৰীসভাত স্থান দিয়া নহʼল।
এইবাৰ নাগালেণ্ডৰ ৬০খন বিধানসভাৰ আসনৰ ভিতৰত এনডিপিপিয়ে ২৫খন আৰু বিজেপিয়ে ১২খন আসন লাভ কৰে। এন চি পিয়ে ৭ খন, এন পি পি ৫ খন, এন পি এফ (নগা পিপলছ ফ্ৰণ্ট), আৰ পি আই আৰু লোকজন শক্তি পাৰ্টিয়ে (ৰামবিলাছ) ২ খনকৈ আসন লাভ কৰে। জেডি (ইউ) ১ খন আৰু নিৰ্দলীয় দলে ৪ খন আসন লাভ কৰে।
