ডিব্ৰুগড়-গোমতীনগৰ-ডিব্ৰুগড় অমৃত ভাৰত এক্সপ্ৰেছৰ শুভাৰম্ভ কৰা হৈছে৷ দেওবাৰে অৰ্থাৎ ১৮ জানুৱাৰীত ডিফু ৰে’লৱে ষ্টেচনত আয়োজিত বিশেষ অনুষ্ঠানত এই ৰে’লখনৰ শুভাৰম্ভণি কৰা হয়৷ এই ৰে’লখনৰ শুভাৰম্ভ কৰাৰ পাছত উত্তৰ পূৰ্বাঞ্চলত এটা নতুন আশাৰ পৰিৱেশ সৃষ্টি কৰিছে। দেশৰ পৰিবহণ পৰিকাঠামো শক্তিশালী কৰা আৰু দূৰৱৰ্তী অঞ্চলসমূহলৈ সহজ যাতায়াত কৰাত ভাৰত চৰকাৰৰ অব্যাহত প্ৰচেষ্টাত এই কাৰ্যই এটা গুৰুত্বপূর্ণ মাইলষ্ট’ন হিচাপে চিহ্নিত কৰিছে।
প্ৰধানমন্ত্ৰী নৰেন্দ্ৰ মোডীৰ পৰিকল্পনাত সাজু কৰা এই নন-এচি অমৃত ভাৰত এক্সপ্ৰেছৰ প্ৰথম যাত্ৰাটো প্ৰধানমন্ত্ৰীয়ে ভিডিঅ’ কনফাৰেন্সিঙৰ মাধ্যমেৰে আনুষ্ঠানিকভাৱে পতাকা উত্তোলন কৰি আৰম্ভ কৰে। লামডিং ডিভিছনৰ ডিভিজনেল ৰে’লৱে মেনেজাৰৰ তত্বাৱধানত ডিফুত আয়োজিত অনুষ্ঠানটো সন্ধ্যা প্ৰায় ৬ বজাত আৰম্ভ হয়৷ অনুষ্ঠানত বহু যাত্ৰী, ৰে’লৱে বিষয়া-কৰ্মচাৰীৰ লগতে বহু লোক আৰু স্থানীয় বিশিষ্ট ব্যক্তিয়ে অংশ গ্ৰহণ কৰে।
দূৰণিবটীয়া যাত্ৰাৰ ক্ষেত্ৰত অমৃত ভাৰত এক্সপ্ৰেছ উত্তৰ পূৰ্বাঞ্চলৰ বাবে এটা উল্লেখযোগ্য ব্যৱস্থা বুলি প্ৰতিপন্ন হৈছে। নন-এচি সেৱা হোৱাৰ লগতেএই ৰে’লখনত সাধাৰণতে প্ৰিমিয়াম শ্ৰেণীৰ ব্যৱস্থা উপলব্ধ৷ উল্লেখ্য যে ৰে’লখনত আধুনিক সুবিধাসমূহ সংযোজন কৰিছে। ইয়াত আৰামদায়ক ছিট ডিজাইন, সম্পূৰ্ণ সংযুক্ত ক’চ, অধিক নিৰাপত্তা আৰু বিশ্বাসযোগ্যতাৰ বাবে শক্তিশালী টুইন-ইঞ্জিন ব্যৱস্থা কৰিছে ৰে’লখনত। তদুপৰি, ছেমি-অটোমেটিক কাপলাৰ, চিল্ড গেংৱে’, ফায়াৰ ডিটেকচন ছিষ্টেম আৰু টক-ব্যাক ইউনিট আদি সুবিধাসমূহে যাত্ৰীৰ নিৰাপত্তা এক নতুন মানদণ্ডলৈ লৈ গৈছে। প্ৰতি সপ্তাহত চলাচল কৰিব এই ৰে’ল সেৱা৷
ৰে’লখনৰ নম্বৰ ১৫৯৪৯ হিচাপে ডিব্ৰুগড়ৰ পৰা আৰম্ভ হ’ব৷ ৰে’লখন উত্তৰ প্ৰদেশৰ লক্ষ্ণৌ গোমতীনগৰৰ সৈতে সংযোগ কৰা হৈছে। ৰুটটোৱে অসম, নগালেণ্ড, পশ্চিম বংগ, বিহাৰ আৰু উত্তৰ প্ৰদেশ হৈ যাব৷ আনহাতে ডিফু, লামডিং, ডিমাপুৰ আৰু গুৱাহাটী আদি গুৰুত্বপূৰ্ণ ষ্টেচনত ৰখা হয়। এই ৰি’ল সেৱাই দূৰণিবটীয়া যাত্ৰাসমূহ সহজ কৰাৰ লগতে সাধাৰণ যাত্ৰীসকলৰ বাবে এটা সুলভ আৰু আৰামদায়ক বিকল্প ৰূপে পৰিগণিত হ’ব বুলি আশা কৰা হৈছে। ডিফুৰ উদ্বোধনী অনুষ্ঠানত লোকসভা সাংসদ অমৰসিং টিছ’ আমন্ত্ৰিত অতিথি হিচাপে উপস্থিত আছিল।
তেওঁৰ সৈতে ডিফুৰ বিধায়ক বিদ্যাসিং ইংলেং, কেএএএছিৰ কাৰ্যবাহী সদস্য ৰিতেশ ইংহী, ৰে’লৱে এডিএম (লামডিং) এ কে পাণ্ডে আৰু এপিআৰ’ (ডিমাপুৰ) অভিজিৎ দাস উপস্থিত থাকে। এই ৰে’ল সেৱাই কাৰ্বি আংলং আদি অঞ্চলসমূহৰ বাবে আঞ্চলিক গুৰুত্ব আৰু যাতায়াত ব্যৱস্থা সুলভ কৰাৰ লগতে অৰ্থ-সামাজিক জীৱনৰ ওপৰত ইয়াৰ অভাৱনীয় প্ৰভাৱ পৰিব বুলি আশা কৰা হৈছে৷
