মাত্ৰ এটা দিন পূৰ্বে সমাপ্ত হোৱা কাৰ্বি যুৱ মহোৎসৱৰ সোণালী জয়ন্তী বৰ্ষৰ অনুষ্ঠানৰ উৎসৱৰ আনন্দই উদ্বেলিত কৰি ৰখা কাৰ্বি আংলঙৰ সাধাৰণ জনতাৰ বিৰাজ কৰি থকা উৎসৱমূখৰ পৰিৱেশক এক নতুন মাত্ৰা প্ৰদান কৰি আজি জিলাখনৰ সংস্কৃতিপ্ৰেমী জনতা সাক্ষী হʼল আন এক বিৰল অভিলেখৰ। উল্লেখযোগ্য যে, কাৰ্বিসকলৰ পৰম্পৰাগত তথা অন্যতম জনপ্ৰিয় থলুৱা ক্ৰীড়া কেংডংদাং কেদাম (পেং দৌৰ)ৰ জৰিয়তে আজি গীনিজ বুকৰ বিশ্ব অভিলেখ সৃষ্টি কৰা হয়
কাৰ্বি যুৱ মহোৎসৱৰ সোণালী জয়ন্তী বৰ্ষৰ সৈতে সংগতি ৰাখি কাৰ্বি আংলং স্বায়ত্বশাসিত পৰিষদৰ উদ্যোগত তথা কাৰ্বি সাংস্কৃতিক সমাজৰ সহযোগত আজি জিলাখনৰ বকলীয়াঘাটত এক উৎসৱমূখৰ পৰিৱেশত গীনিজ ৱৰ্ল্ড ৰেকৰ্ড সমিতিৰ প্ৰতিনিধিৰ উপস্থিতিত এই অভিলেখ সৃষ্টি কৰা হয়। কেংডংদাং কেদাম অৰ্থাৎ পেং দৌৰ দুডাল বাঁহৰ ওপৰত থকা খোপনিত ভৰি থৈ খোজ কঢ়া বা দৌৰাৰ এক বিশেষ ক্ৰীড়া। কাৰ্বি জনগোষ্ঠীয় জীৱনত বিশেষভাৱে জনপ্ৰিয় এই বিশেষ খেলবিধক লৈ বিশ্ব অভিলেখ গঢ়াৰ উদ্দেশ্যে আজি বকলীয়াঘাটৰ চাৰিলেন যুক্ত পথৰ ওপৰত এক বিশেষ আয়োজন কৰা হয়।
সেই অনুসৰি আজি বিয়লি প্ৰায় দুই বজাত 721 গৰাকী কাৰ্বি যুৱকে উক্ত ক্ৰীড়াত একেলগে অংশগ্ৰহণ কৰি বিশ্ব অভিলেখৰ সৃষ্টি কৰে। অনুষ্ঠানৰ অন্তত গীনিজ ৰেকৰ্ড সমিতিৰ প্ৰতিনিধি ঋষি নাথে আনুষ্ঠানিকভাৱে এই কথা ঘোষণা কৰে। সাংবাদিকৰে হোৱা বাৰ্তালাপত গীনিজ ৰেকৰ্ড সমিতিৰ প্ৰতিনিধি গৰাকীয়ে সমগ্ৰ বিশ্বতে প্ৰথমবাৰৰ বাবে এনে অভিলেখ হোৱা বুলি জানিবলৈ দিয়ে।
এনে বিৰল অভিলেখ নিশ্চিত হোৱাৰ ক্ষণত উক্ত স্থানত উপস্থিত থকা কেইবা হাজাৰোধিক লোকে হাত চাপৰিৰে অংশগ্ৰহণকাৰী সকলক অভিনন্দন জনায়। মঞ্চত থকা অভ্যাগত সকলেও ঠিয় হৈ হাত চাপৰিৰে অংশগ্ৰহণকাৰী সকলক অভিনন্দন জ্ঞাপন কৰে। বিশ্ব অভিলেখৰ ঘোষণা হোৱাৰ পিছতে কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে সকলোকে অভিনন্দন আৰু ধন্যবাদ জনায়।
আজিৰ এই অভিলেখ সৃষ্টি অনুষ্ঠানত সাংসদ হৰেণছিং বেʼ, বিধায়ক বিদ্যাছিং ইংলেং, দৰছিং ৰংহাং, পৰিষদৰ অধ্যক্ষ ৰাজু তিচʼ, উপাধ্যক্ষ অজিত কুমাৰ দেʼ, কাৰ্বি সাংস্কৃতিক সমাজৰ সভাপতি চন্দ্ৰছিং ক্ৰʼ, কাৰ্বি আংলং স্বায়ত্বশাসিত পৰিষদৰ কেইবাগৰাকীও সদস্য, কাৰ্যবাহী সদস্যকে ধৰি ভালেসংখ্যক বিশিষ্ট ব্যক্তি উপস্থিত থাকে।
