ৰাজ্যত অব্যাহত আছে চৰকাৰী ভূমিত বেদখল উচ্ছেদ অভিযান। অসম চৰকাৰে বিশেষকৈ বেদখলকাৰীৰ বিৰুদ্ধে মুখ্যমন্ত্ৰীৰ কঠোৰ স্থিতিৰ বাবে অসমৰ বিভিন্ন প্ৰান্তত চৰকাৰী ভূমিত বেদখলৰ বিৰুদ্ধে এই উচ্ছেদ(Eviction) অভিযান চলি আছে। এই অভিযানৰ অংশ হিচাপে মঙলবাৰে কাৰ্বি আংলং জিলাৰ বকলীয়াঘাটত প্ৰশাসনে চলায় এক বৃহৎ উচ্ছেদ অভিযান। বকলীয়াঘাটৰ যমুনা নদীৰ সমীপৰ জলসিঞ্চন বিভাগৰ ৩৫০ বিঘা ভূমিত এই উচ্ছেদ অভিযান চলোৱা হয়।
উল্লেখ্য যে জিলা প্ৰশাসনে ইতিমধ্যে এই উচ্ছেদ সন্দৰ্ভত জাননী জাৰি কৰিছিল আৰু তাত অবৈধভাৱে থকা লোকসকলক আঁতৰি যাবলৈ নিৰ্দেশ দিছিল। কিন্তু যিসকল লোক তাৰ পৰা আঁতৰি যোৱা নাই বা নিৰ্মাণ আন্তঃগাঁথনি ভাঙি নিয়া নাই তাৰ ওপৰত পূৰ্বতে প্ৰদান কৰা জাননী অনুসৰি মঙলবাৰে পুৱাৰে কটকটীয়া নিৰাপত্তা ব্যৱস্থাৰ মাজেৰে বকলীয়াঘাটত উচ্ছেদ অভিযান চলোৱা হয়।
এই উচ্ছেদ অভিযানত ব্যৱহাৰ কৰা হয় প্ৰায় দহখনকৈ এক্সকেভেটৰ তথা ফকলেন। আনহাতে, অভিযানৰ সময়ত যাতে কোনো ধৰণৰ অপ্ৰীতিকৰ ঘটনা সংঘটিত নহয় তাৰবাবে আৰক্ষী, চি আৰ পি এফ, কমাণ্ডোৰ বিশাল সুসজ্জিত বাহিনী মোতায়েন কৰা হয়। অৱশেষত সম্পূৰ্ণ নিৰাপত্তা ব্যৱস্থাৰ মাজেৰে পুৱাৰে পৰা চলোৱা উচ্ছেদ অভিযানৰ প্ৰথম দিনটো প্ৰায় শান্তিপূৰ্ণভাৱে সামৰণি পৰে।
উল্লেখ্য যে এই উচ্ছেদ অভিযানৰ প্ৰথমদিনা কেইবা শ পৰিয়ালৰ বাসগৃহ, ব্যৱসায়িক প্ৰতিষ্ঠানৰ লগতে শ্ৰীমন্ত শংকৰদেৱ সমাজৰ জিলা শাখাৰ নামঘৰ আৰু এটা মছজিদতো উচ্ছেদ চলোৱা হয়। অৱশ্যে উচ্ছেদৰ জাননী লাভ কৰি বহু লোক ইতিমধ্যে উক্ত স্থানৰ পৰা আঁতৰি যোৱা বুলি জানিব পৰা গৈছে।
