উচ্ছেদক কেন্দ্ৰ কৰি হিংসাত্মক ঘটনাৰ সৃষ্টি হৈছে দিল্লীৰ তুৰ্কমান গে’ট অঞ্চলত। অবৈধ নিৰ্মাণকাৰ্য ভাঙি (Delhi Eviction) থকাৰ সময়তে প্ৰতিবাদকাৰীৰ ক্ষোভৰ সন্মুখীন হ’বলগীয়া হয় আৰক্ষী।
তেওঁলোকৰ ওপৰত ইটা-শিল নিক্ষেপ কৰাৰ অভিযোগ উত্থাপন হৈছে। আৰক্ষীয়ে জনোৱা মতে, প্ৰতিবাদকাৰীয়ে শিলগুটি নিক্ষেপ কৰাৰ ফলত কমেও চাৰি-পাঁচজন আৰক্ষী আহত হয়।
ঘটনা সন্দৰ্ভত এফ আই আৰ ৰুজু কৰা হৈছে। দিল্লী উচ্চ ন্যায়ালয়ৰ নিৰ্দেশত দিল্লী পৌৰ নিগমৰ বিষয়াসকলে তুৰ্কমান গে’ট এলেকাত কিছু অবৈধ নিৰ্মাণকাৰ্য ভাঙিবলৈ যায়। তেওঁলোকৰ সৈতে আছিল আৰক্ষীও। মঙলবাৰে মাজনিশাৰ পৰা আৰম্ভ হয় এই অভিযান। ১৭ খন বুলড’জাৰ লৈ যোৱা হৈছিল।
অঞ্চলটোত আৰক্ষীৰ বেৰিকেড স্থাপন কৰা হয়। সংবাদ সংস্থাৰ সূত্ৰ অনুসৰি, ভাঙোন কাৰ্য আৰম্ভ হোৱাৰ লগে লগে অঞ্চলটোত বহু লোক সমবেত হয়। অবৈধ নিৰ্মাণসমূহ যাতে ভাঙি নেপেলায় তাৰবাবে দাবী জনায়। কিন্তু সেই দাবী নামানি বুলড’জাৰ ব্যৱহাৰ কৰাৰ লগে লগে অশান্তিৰ সৃষ্টি হয়।
আৰক্ষীৰ বেৰিকেড ভাঙি উক্ত স্থানৰ ফালে আগবাঢ়ি যায় উত্তেজিত ৰাইজ। আৰক্ষীয়ে তেওঁলোকক বাধা দিবলৈ চেষ্টা কৰাত প্ৰতিবাদকাৰীৰ সৈতে কাজিয়াত লিপ্ত হয়। ভিৰৰ মাজৰ পৰা ইটা-শিল আহি থাকে। পৰিস্থিতি নিয়ন্ত্ৰণৰ বাবে অঞ্চলটোত অধিক আৰক্ষী মোতায়েন কৰা হয়। প্ৰতিবাদকাৰীক ছত্ৰভংগ দিয়াবলৈ আৰক্ষীয়ে কন্দুৱা গেছ নিক্ষেপ কৰে।
অৱশ্যে বুধবাৰে পুৱাৰে পৰা পৰিস্থিতি নিয়ন্ত্ৰণত আছে। পুৱাৰে পৰা ভাঙোনৰ কামো চলি আছে। পৌৰসভাৰ বিষয়াসকলে কয়, “ৰাতি কিছু বিশৃংখলতাৰ সৃষ্টি হৈছিল। অৱশ্যে এতিয়া পৰিস্থিতি নিয়ন্ত্ৰণত আছে। সামগ্ৰিক প্ৰক্ৰিয়াটো অতি সুকলমে চলি আছে।”
আৰক্ষীক কোনে আক্ৰমণ কৰিছিল সেয়া এতিয়াও স্পষ্ট হোৱা নাই। তেওঁলোকৰ সন্ধান আৰম্ভ কৰা হৈছে। আৰক্ষীয়ে জনোৱা মতে, ঘটনাস্থলীত থকা চিচিটিভি ফুটেজ আৰু আন কেমেৰাৰ ফুটেজ পৰীক্ষা কৰি আক্ৰমণকাৰীক চিনাক্ত কৰা হ’ব। আৰক্ষীয়ে তেওঁলোকৰ বিৰুদ্ধে আইনী ব্যৱস্থা গ্ৰহণ কৰিব।
তুৰ্কমান গে’ট অঞ্চলত প্ৰায় ৩৯ হাজাৰ বৰ্গফুট মাটি ‘অবৈধ দখল’ৰ অভিযোগ উত্থাপন হৈছে। বাসিন্দাসকলক অঞ্চলটো খালী কৰিবলৈ অনুৰোধ জনোৱা হৈছিল যদিও কোনো ব্যৱস্থা গ্ৰহণ কৰা হোৱা নাছিল। ‘ছেফ ইণ্ডিয়া ফাউণ্ডেশ্যন’ নামৰ এটা সংস্থাই দিল্লী উচ্চ ন্যায়ালয়ত অবৈধ দখল উচ্ছেদ কৰাৰ বাবে আবেদন দাখিল কৰে। উচ্চ ন্যায়ালয়ৰ নিৰ্দেশত অঞ্চলটোত এক জৰীপ চলোৱা হয়।
প্ৰতিবেদন দাখিল কৰাৰ পিছতে আদালতে অবৈধ নিৰ্মাণকাৰ্য ভাঙি পেলোৱাৰ নিৰ্দেশ দিয়ে। ইয়াৰ উপৰি তিনি মাহৰ সময়সীমাও নিৰ্ধাৰণ কৰা হৈছে। উচ্চ ন্যায়ালয়ৰ নিৰ্দেশ অনুসৰি পৌৰসভাই উচ্ছেদ অভিযানত নামোতে স্থানীয় লোকৰ এটা অংশই হিংসাত্মক ৰূপ ধাৰণ কৰে।
