পশ্চিম কাৰ্বি আংলঙত হাতী-মানুহৰ সংঘাত বৃদ্ধি পাইছে৷ শেহতীয়াকৈ হাতীৰ আক্ৰমণত এগৰাকী মহিলা নিহত হোৱাৰ খবৰে ৰাইজৰ মাজত শোকৰ বন্যা বোৱাৰ লগতে তীব্ৰ প্ৰতিক্ৰিয়াৰ সৃষ্টি হৈছে৷
উল্লেখ্য যে পাহাৰীয়া জিলাখনৰ জিৰিকিন্দেং থানাৰ অন্তৰ্গত হিজুংলাংছ’ত হাতীৰ গচকত এগৰাকী বৃদ্ধা নিহত হয়৷ ৭০ উৰ্দ্ধৰ নিহত মহিলাগৰাকীৰ নাম কাছাং ক্ৰ’পি বুলি জানিব পৰা গৈছে। প্ৰাপ্ত সংবাদ মতে বৃদ্ধাগৰাকীয়ে কেইগৰাকীমানৰ মহিলাৰ লগত গাঁৱতে অনুষ্ঠিত হোৱা পূজা এভাগৰ পৰা ঘৰলৈ উভতি আহিছিল। তেতিয়াই বনৰীয়া হাতীৰ জাকটোৰ মুখামুখি হয়।
পথত ৰৈ থকা বনৰীয়া হাতীৰ জাকটোৰ পৰা এটা হাতীয়ে বৃদ্ধাগৰাকীক আক্ৰমণ কৰে আৰু গচকি নিহত কৰে৷ হাতীৰ বাবে দিনকদিনে আশ্ৰয়স্থল হ্ৰাস পোৱাৰ লগতে খাদ্যৰ অভাৱৰ বাবে মানুহৰ লগত সংঘাত বৃদ্ধি পাইছে৷ ফলত বনৰীয়া হাতীৰ আক্ৰমণত মানুহ নিহত হ’ব লগা হৈছে বুলি বিভিন্ন লোকে মত প্ৰকাশ কৰে৷
