বিনামূলীয়া অতিৰিক্ত ৰেচন বন্ধ কৰিবলৈ বিত্ত মন্ত্ৰালয়ৰ পৰামৰ্শ

খাদ্য আৰু ৰাজহুৱা বিতৰণ মন্ত্ৰালয়ে প্ৰকল্পটোৰ সময়সীমা বৃদ্ধি কৰাৰ প্ৰস্তাৱ আগবঢ়াইছে যদিও বিত্ত মন্ত্ৰালয়ৰ মতে প্ৰকল্পটো ইয়াতেই শেষ হʼব লাগে। আঁচনিখনৰ সময়সীমা বৃদ্ধি কৰিবলৈ হʼলে বিনামূলীয়া খাদ্যশস্যৰ পৰিমাণ কমাই দিব লাগে। চৰকাৰী সূত্রৰ মতে, বুধবাৰে কেন্দ্রীয় কেবিনেটৰ বিত্ত পৰিক্রমা সমিতিৰ বৈঠকত এই সন্দর্ভত চূড়ান্ত সিদ্ধান্ত লʼব পাৰে।

উল্লেখ্য, বিজেপি আৰু অবিজেপি দল নিৰ্বিশেষে বিভিন্ন ৰাজ্য চৰকাৰে কেন্দ্ৰীয় চৰকাৰক প্ৰধানমন্ত্ৰী গৰীৱ কল্যাণ অন্ন যোজনা অক্টোবৰৰ পৰা ডিচেম্বৰলৈ কমেও আৰু তিনিমাহ বৃদ্ধি কৰিবলৈ দাবী জনাইছিল। যাতে উৎসৱৰ বতৰত অন্তত দুখীয়া লোকক বিনামূলীয়াকৈ অতিৰিক্ত ৰেচন দিয়া হয়। গুজৰাট, হিমাচল প্ৰদেশতো এই তিনিমাহত নিৰ্বাচন আছে।

কোভিডৰ লকডাউনৰ পিছত আৰম্ভ কৰা এই আঁচনিখনে খাদ্য সুৰক্ষা আইনক সামৰি লোৱা ৮০ কোটি লোকক প্ৰতিমাহে প্ৰতিজনক অতিৰিক্ত পাঁচ কিলোগ্ৰাম চাউল বা ঘেঁহু প্ৰদান কৰে। খাদ্য সুৰক্ষা আইনত খাদ্যশস্যও কম দামত বিতৰণ কৰা হয়। চৰকাৰী সূত্ৰ অনুসৰি, কেন্দ্ৰীয় খাদ্য আৰু ৰাজহুৱা বিতৰণ মন্ত্ৰালয়ে এই সন্দৰ্ভত বিত্ত মন্ত্ৰালয়লৈ প্ৰস্তাৱ প্ৰেৰণ কৰিছে।

খাদ্য আৰু ৰাজহুৱা বিতৰণ সচিবৰ হিচাপ অনুসৰি অতিৰিক্ত ৪৪,৭৬২ কোটি টকা ব্যয় কৰি তিনিমাহৰ বাবে অতিৰিক্ত ৰেচন প্ৰদান কৰা হʼব। কিন্তু বিত্ত মন্ত্ৰালয়ৰ ব্যয় বিভাগে সোমবাৰে খাদ্য আৰু ৰাজহুৱা বিতৰণ মন্ত্ৰালয়ক জনাইছে যে খাদ্যশস্যৰ বজাৰ মূল্য লʼলে ৫০ শতাংশ অধিক খৰচ হʼব।

বিত্ত মন্ত্ৰালয়ে যুক্তি আগবঢ়ায় যে ইউক্ৰেইনত চলি থকা যুদ্ধৰ ফলত ৰাজকোষৰ ওপৰত হোৱা হেঁচা, ইন্ধনৰ মূল্যবৃদ্ধি আৰু ৰাজসাহায্যৰ ব্যয় বৃদ্ধিৰ বাবে কোভিডৰ প্ৰাদুৰ্ভাৱ বহু পৰিমাণে হ্ৰাস পাইছে। ফলত এই সমাধানৰ চিন্তা কৰা সংকট আৰু নাই। ইয়াৰ বাহিৰেও যদি এই প্ৰকল্পটো দীৰ্ঘদিনলৈ অব্যাহত ৰখা হয় তেন্তে ইয়াক স্থায়ী ব্যৱস্থা হিচাপে গণ্য কৰা হʼব।

তেতিয়া এই প্ৰকল্পটো বন্ধ কৰাটো কঠিন হʼব। ফলত ৩০ ছেপ্টেম্বৰত এই প্ৰকল্প বন্ধ কৰিব লাগে। বিত্ত মন্ত্ৰালয়ে লগতে কয় যে ৰাছিয়া-ইউক্ৰেইন যুদ্ধৰ ফলত ইতিমধ্যে বিশ্ব বজাৰত খাদ্যৰ নাটনি হৈছে। আনকি অতিৰিক্ত ৰেচন বিতৰণৰ আঁচনিখন অব্যাহত ৰাখিবলৈ পৰ্যাপ্ত খাদ্যশস্যও নাথাকিবও পাৰে।

গতিকে এই প্ৰকল্প অব্যাহত থাকিলেও খাদ্য শস্যৰ পৰিমাণ হ্ৰাস কৰিব লাগে। সৰ্বভাৰতীয় ৰেচন শ্বপ ডিলাৰ ফেডাৰেচনৰ সাধাৰণ সম্পাদক বিশ্বম্বৰ বসুৱে কয়, “আমি কেন্দ্ৰক এই আঁচনিৰ সময়সীমা বৃদ্ধি কৰিবলৈ অনুৰোধ জনাইছো। কাৰণ কোভিডৰ বাবে দৰিদ্ৰ, মধ্যবিত্ত, নিম্ন মধ্যবিত্ত সকলোৰে অৱস্থা বেয়া।”

উল্লেখ্য, বিত্তীয় বৰ্ষৰ বাকী ছমাহত অৰ্থাৎ অক্টোবৰৰ পৰা মাৰ্চলৈ আন ৮৫ হাজাৰ কোটি টকা ব্যয় কৰা হʼব অন্ন যোজনা চলোৱাৰ বাবে। যোৱা দুবছৰত ব্যয় হৈছে ২.৬০ লাখ কোটি টকা। খাদ্য সুৰক্ষাৰ ক্ষেত্ৰত পাঁচজনীয়া এটা পৰিয়ালে ইতিমধ্যে প্ৰতি কিলোগ্ৰামত ২ৰ পৰা ৩ টকাৰ হাৰত ২৫ কিলোগ্ৰাম খাদ্যশস্য লাভ কৰি আছে।

আৰু ২৫ কেজি খাদ্যশস্য বিনামূলীয়াকৈ যোগান ধৰাৰ প্ৰয়োজন আছেনে নাই, সেইটো বিবেচনা কৰা প্ৰয়োজন। ধান আৰু ঘেঁহুৰ উৎপাদন কম হোৱাৰ বাবে খাদ্য আঁচনিৰ সময়সীমা বৃদ্ধি কৰিলে মজুত কৰা চাউল আৰু ঘেঁহুৰ পৰিমাণ নূন্যতম মজুতৰ বিপদজনক স্তৰত উপনীত হʼব পাৰে।