আধাৰ কার্ড (ADHAR CARD) নাথাকিলেও এতিয়াৰে পৰা ৰেচন পোৱাত (Getting ration) আৰু কোনো সমস্যা নহ’ব। কেৱল ৰেচন কার্ড(Ration Card) থাকিলেই পাব ৰেচন। কেন্দ্রীয় খাদ্য মন্ত্ৰালয়ৰ পৰা এই কথা জানিব পৰা গৈছে। ২৯ মার্চত দিল্লীত অল ইণ্ডিয়া ফেয়াৰ প্রাইচ শ্বপ ডিলাৰছ ফেডাৰেচনৰ প্রতিনিধি দলৰ সৈতে কেন্দ্রীয় খাদ্য মন্ত্ৰালয়ৰ সচিব সঞ্জীব চোপ্ৰাৰ বৈঠকত বিষয়টি উত্থাপন কৰা হয়। ৰেচন ডিলাৰসকলে মুঠ ১৪টা বিষয়ত তেওঁৰ দৃষ্টি আকর্ষণ কৰে।
ডিলাৰসকলে খাদ্য মন্ত্ৰালয়ৰ সচিবক জনোৱা মতে, আধাৰ কার্ড নথকাৰ বাবে দেশৰ কোনো নাগৰিকক ৰেচনৰ খাদ্যশস্য পোৱাৰ পৰা বঞ্চিত কৰিব নোৱাৰিব। কাৰণ দেশৰ প্রত্যেক মানুহৰে খাদ্যসামগ্রী পোৱাৰ অধিকাৰ আছে। সূত্রৰ খবৰ মতে, বৈঠকত খাদ্য সচিবে জনাইছে, এই সংক্রান্ত বিষয়ত খাদ্য মন্ত্ৰালয়ে পূৰ্বতেই এখন বিজ্ঞপ্তি জাৰি কৰিছিল। প্রয়োজনত উক্ত বিজ্ঞপ্তিৰ কপি ৰাজ্য চৰকাৰবোৰলৈও প্ৰেৰণ কৰা হ’ব।
